Bandari ya Dar es Salaam imekuwa kielelezo muhimu kwa maendeleo ya kiuchumi na biashara ya Tanzania na nchi za Afrika Mashariki. Hivi karibuni, mabadiliko makubwa yamefanyika katika bandari hii, hasa katika Terminali-1, ambapo DP World imechukua jukumu la usimamizi.
Maboresho haya yameleta matokeo yanayoonekana wazi, yakiimarisha ufanisi wa bandari, kupunguza gharama za usafirishaji, na kuongeza ushindani wa Dar es Salaam kama lango kuu la biashara katika ukanda wa Afrika Mashariki. Haya yafuatayo ni mapinduzi mbali mbali katika maeneo ambayo mpaka sasa DP World imefanikiwa kuyafanyia kazi katika Bandari ya Dar es salaam,
Kupungua kwa Meli Zinazosubirishwa kutia Nanga:
Mojawapo ya maboresho makubwa yanayoonekana ni kupungua kwa idadi ya meli zinazofika nchini (Offshore) zikisubiri nafasi ya kutia nanga katika bandari.
Takwimu zinaonyesha kuwa katikati ya Mei 2024, kulikuwa na meli 26 zilizosubiri nafasi katika Terminal-1, lakini kufikia Agosti 2024, idadi hiyo ilipungua hadi meli 4 pekee. Hii ni hatua muhimu kwani inaonyesha kuimarika kwa ufanisi wa operesheni za bandari, na kupunguza muda wa kusubiri kwa meli, jambo ambalo lina athari chanya kwa biashara na uchumi wa nchi.
Kupungua kwa idadi ya meli zinazokaa kwenye nanga kumekuwa na matokeo makubwa kwa uchumi wa Tanzania. Kampuni ya MSC, ambao ni moja ya wateja wakubwa wa bandari ya Dar es Salaam, imeacha kutumia tozo ya ziada ya dola 1,000 kwa kila kontena lililokuwa linaingizwa nchini Tanzania.
Hii imetafsiriwa kuwa imeokoa takriban dola milioni 600 kwa uchumi wa Tanzania. Tozo hii ilikuwa mzigo mkubwa kwa wafanyabiashara na imeondolewa kwa sababu ya ufanisi uliopatikana kwenye bandari, hali inayovutia biashara zaidi na kuimarisha uchumi wa ndani.
Ushindani wa Bandari ya Dar es Salaam na Mombasa
Bandari ya Dar es Salaam sasa imeweka alama ya ushindani dhidi ya bandari ya Mombasa. Gharama za mizigo kwenda Dar es Salaam na Mombasa sasa ziko sawa, jambo ambalo limeongeza thamani ya Dar es Salaam kama lango kuu la biashara Afrika Mashariki.
Hii inamaanisha kuwa wafanyabiashara sasa wanaweza kuchagua Dar es Salaam bila kuwa na wasiwasi kuhusu gharama za ziada, na hivyo kuifanya kuwa chaguo la kuvutia zaidi kwa biashara za kimataifa zinazotaka kufikia masoko ya Afrika Mashariki na Kati.
Aidha, kupungua kwa idadi ya meli zinazokaa kwenye nanga kumepunguza shinikizo kwenye Terminal-2, ambayo hapo awali ilikuwa ikipokea meli nyingi zaidi kuliko uwezo wake.
Kwa sasa, meli 8 zinafanya kazi katika T2, huku T1 ikichukua sehemu ya mzigo huo. Hii imesaidia kuboresha usambazaji wa mizigo katika bandari nzima, kupunguza muda wa kusubiri na kuongeza ufanisi wa operesheni.
Ufanisi wa Kuingia kwa Meli Moja kwa Moja na Kuimarika kwa Operesheni
Kuboresha uwezo wa meli kutia nanga moja kwa moja inapofika ni jambo jingine ambalo limeboreshwa katika Terminal-1. Hii inamaanisha kuwa meli za kontena na meli za kuingiza na kutoa magari moja kwa moja au meli za mizigo sasa zinaweza kuingia bandari moja kwa moja bila kusubiri.
Hatua hii imepunguza muda wa kusubiri kwa meli, jambo ambalo lina athari chanya kwa gharama za uendeshaji wa kampuni za usafirishaji na kuongeza kasi ya utoaji wa mizigo.
Ufanisi wa operesheni za meli za kontena umeongezeka sana. Kwa mfano, kuanzia Aprili hadi Julai 2024, kumekuwa na ongezeko kubwa la ufanisi wa mashine kubwa ya kunyanyua na kushusha mizigo mizito (kreni), hali ambayo imesaidia kupunguza ucheleweshaji wa kutia nanga na muda wa operesheni za meli.
Meli ya MSC ADU V, ambayo ni meli kubwa zaidi ya kontena kuwahi kushughulikiwa katika bandari ya Dar es Salaam, ilipokelewa na kushughulikiwa kwa ufanisi mkubwa mnamo Juni 2024.
Ufanisi huu umepelekea MSC kuthibitisha kuwa itakuwa na ziara za kila wiki katika bandari ya Dar es Salaam kuanzia Agosti 2024. Hii ni ishara ya kuongezeka kwa imani ya wateja wakubwa kwa uwezo wa bandari hii.
Ushuhuda wa Wateja: Sauti za Wadau Muhimu
Maboresho haya yamepokelewa vyema na wadau wakuu wa sekta ya usafirishaji na biashara. Maoni ya wateja yanatoa picha kamili ya jinsi DP World imeweza kuboresha hali ya mambo katika bandari ya Dar es Salaam ndani ya muda mfupi sana.
Noel Quiambao, Mkurugenzi Mtendaji wa MSC Tanzania, ameelezea kuridhishwa kwake na maendeleo yaliyofanyika. Alisisitiza kuwa MSC sasa ina imani kubwa na bandari ya Dar es Salaam kutokana na maboresho haya, na kuthibitisha kuwa MSC itaendelea na huduma zake za kila wiki katika bandari hii. Hii ni hatua kubwa inayothibitisha kuongezeka kwa ushindani wa bandari hii katika soko la kimataifa.
Joshua Batterton wa Glencore, alitoa maoni chanya kuhusu maboresho yaliyofanywa na DP World katika terminali ya TPA. Alisema kuwa watu wengi wanazungumzia kwa furaha na matumaini kuhusu hali mpya ya mambo katika bandari ya Dar es Salaam, jambo ambalo linaashiria mafanikio ya DP World katika kuboresha huduma na mazingira ya kazi katika bandari hii.
Naye, Hafsa wa Royal Freight alielezea kuridhishwa kwa wateja wao kutokana na mabadiliko makubwa yaliyofanyika katika kipindi kifupi. Alitambua changamoto za awali ambazo DP World ilikumbana nazo, lakini pia alisifu juhudi zilizofanyika kuhakikisha kuwa mabadiliko hayo yanafanyika bila kuathiri operesheni za kawaida.
Bazil Mganga wa Dar Star ICDV alitoa shukrani kwa DP World kwa juhudi zao za kuboresha ufanisi katika bandari, hasa katika operesheni za meli za kuingiza na kutoa magari moja kwa moja au meli za mizigo (RoRo).
Alielezea kuwa licha ya changamoto za awali, DP World imefanikiwa kuboresha huduma zao kwa kiasi kikubwa, jambo ambalo limeleta tija kubwa kwa wafanyabiashara na wadau wengine wa sekta hii.
Ally Desouza wa AGL Group, alitoa pongezi kwa huduma nzuri na ushirikiano wa timu ya DP World, akisisitiza kuwa maboresho haya yameleta mabadiliko makubwa katika ufanisi wa operesheni za usafirishaji wa mabomba ya mradi wa EACOP. Hii inaonyesha jinsi DP World imeweza kubadilisha operesheni za bandari ya Dar es Salaam kuwa bora zaidi na zenye ufanisi mkubwa.
Hitimisho kuhusiana na mabadiliko yanayoendelea katika Bandari ya Dar es Salaam.
Maboresho yanayoendelea katika bandari ya Dar es Salaam yanadhihirisha dhamira ya DP World ya kuifanya bandari hii kuwa moja ya bandari bora zaidi duniani. Hii ni pamoja na kuimarisha usalama, kuongeza ufanisi wa operesheni, na kupunguza gharama za uendeshaji kwa wateja.
Kwa kuzingatia maoni chanya kutoka kwa wateja na wadau, ni wazi kwamba DP World imeleta mabadiliko makubwa ambayo yana faida kubwa kwa uchumi wa Tanzania na kanda ya Afrika Mashariki kwa ujumla.
Mabadiliko haya yanayofanyika katika bandari ya Dar es Salaam siyo tu yanaboresha nafasi ya Tanzania kama lango kuu la biashara Afrika Mashariki, bali pia yanaongeza ushindani wa nchi hii katika soko la kimataifa.
Kadiri maboresho haya yanavyoendelea, ni dhahiri kuwa bandari ya Dar es Salaam itazidi kuimarika na kuwa kitovu cha biashara na uchumi katika ukanda huu na zaidi.
